علشان انتى حرة … مش من حق حد يشوف منك اللي مش عاوزاه يشوفه إلا بإرادتك … ومن حقك اختار مين اللي يشوف منك أجمل ما عندك .. واللي علشان يشوف ده ويبقى حقه وحلاله بلاله عن طيب خاطر.. لازم هو كمان يديكى مشاعره واللي باقي من عمره عن طيب خاطر…
2 - علشان أننى غالية .. مينفعش أقلل من قيمة نفسك واخليها عرضة لكل العيون .. ويبقى خروجك مكشوفة ضوء أخضر لكل من هب ودب يسرق منك ولو نظرة لأي جزء مش متغطي منك .. حتى لو مكنش ده قصدك … بس مش حتقدرى تمنعيه … (كامل اعتذاري لغير المحجبات.. ولكن ده اللي حيوصل منك لضعيفي النفوس حتى لو مكنش ده قصدك.. وده اللي علشانه ربنا فرض الحجاب .. علشان ميطمعش الذي في قلبه مرض) … مع الأخذ في الاعتبار انه “كل من هب ودب ده” مش بس الشباب اللي بيعاكس البنات في الشارع .. ده يتضمن اي حد معدي شاب محترم او رجل او طفل او عجوز او امراة او فتاة .. كل دول بقى من الممكن انهم يبصوا ليكى … لأ ده كمان يمكن ماعجبهمش ويدوروا وشهم إعراضاً
3- علشان أنتى بتحترمى نفسك .. وشايفة نفسك كبيرة قدام نفسك .. ومينفعش تنزلى سوق المنافسة في الأنوثة علشان تفوزى في الآخر بنظرة شهوانية أو كلمة غزل رخيصة أو عرض صحوبية
4- علشان انتى جمالك مش خارجي وبس.. ومن حقك ان اللي ييجى يتجوزنك .. واللي حاتديله الباقي من عمرك .. واللي حتديله كل مشاعرك .. واللي حتقاسميه أحلامك وأفكارك .. واللي حتخلفيه منه ولادك ... مايختاركيش على مقاييس شكلية وبس .. أو تبقى هي دي العامل الأساسي في أختياره ليكى … علشان كدة مش ضروري يشوفك في كامل زينتك وجمالك قبل ما يتجوزك .. الأهم انه يحب روحك ويعجب بشخصيتك ... ويرتاح معاكى نفسياً.. (أصل في بنات بتأجل الحجاب لحد ما تتجوز.. على أساسا انها تكون شنكلت واحد وضمنته).. مع إن مفيش حاجة مضمونة في الزمن ده .. واللي اختارها علشان جمالها .. ممكن قوي يتجوز عليها واحدة أجمل منها.. لأنه أكيد في الأجمل منها يعني
5. علشان أننى بتخافى على أخوكى في الله... اللي بيشوفك في الشغل أو في الكلية أو في المواصلات أو في الشارع .. ويمكن يكون عاوز يقرب من ربنا .. وبيجاهد نفسه علشان يغض بصره.. فمترضيش لنفسك انك تكونى سبب في انك تفتنيه..
6. علشان أنتى بتشيلى هم أخوكى فالله.... اللي نفسه يتجوز ومش قادر لضعف إمكانياته المادية .. فمش ضروري يعني تزودى عليه همومه… وتخيله في الرايحة والجاية ..
7. ده غير حاجة مهمة كمان … الكفن بتاع النساء.. فيه حجاب.. فاللي مش حتلبسه وهي حية بإرادتها طاعة لله.. حتلبسه كدة كدة وهي رايحة قبرها.. وطالما ربنا بيقول اننا نتستر حتى واحنا رايحين قبورنا وخلاص انتهى التكليف … ومحدش حيشوفنا تاني ولا حد حيطمع فينا .. يبقى مفيش معنى اننا نمشي مكشوفين لكل العيون واحنا أحياء نرزق... يبقى الأولى تطيعى ربنا بإرادتك وتقابليه وهو راضي عنك وتخدى أجري كامل.. ولاّ انك متلبسيهوش غير وانك رايحه تقابلى ربنا فى الاخرة وهو غضبان عليكى؟
والأسباب اللي فوق دي .. هي اللي فهمتنا ليه ربنا فرض علينا الحجاب.. مش تعسير ولا تضييق ..
الحجاب فعلا عزة وكرامة.. ميعرفهاش غير اللي داق طعم الستر..
ربنا يهدينا ويهدي بنات المسلمين
السبت سبتمبر 12, 2009 6:38 pm